[الصل]

الاخ الكريم فارس برقا

بيظ الله وجهك يالذيب وكثر الله من امثالك


ولدي هذا التعقيب الذي ارجو ان اوفق فيه


القصيده موجهه لضيف الله الذويبي

بعد انهاء المعركه بهزيمة مطير تراجعة ونزلت على حسو الرويقي

واخذت ترسل لحرب لمناصرتها واعادة الكره فوجه تركي القصيده الى الذويبي

يا راكب اللي مـا ترقـع رهوقـه = حرً على قطع أشهب اللال صبـار
هاته ودنه وانسـف الكـور فوقـه = أسبق من اللي يدهل العش بالغـار
كودً على عيرات الأنضـا لحوقـه = فجً عضوده ما قطع في رحا الـزار
وحسو الرويقي نسم النضـو فوقـه = والحسو قدامك من الصيف معتـار
ملفـاك شيـخً زيـن الله وفـوقـه = ضيف الله اللي يكرم الضيف والجار
ليا قال ويش النضو يا للي تسوقـه = قله من ابن حميد يوصلك الأخبـار
رد البرا من فـوق عقلـه خنوقـه = وثور ظعنهم ناحرن عقلـة الجـار
جونا بجمع جـات علـوى تسوقـه = حمرً على ماوصف الخشم سنجـار
جونـا يبـون العـد والعـد فوقـه = ربعٍ مسقية العـدا كـاس الامـرار
خذنا الجمل والبيت والقيـن فوقـه = وتسعين لحية في حجا القوز ما سار
كم جادلٍ ريـح العويـدي نشوقـه = من عقبنـا قامـت تقلـط لقصـار
انه ضيف الله عـن الـورد فوقـه = مير أبتخص حتى تسمع بالاشـوار

وحسو الرويقي نسم النضـو فوقـه = والحسو قدامك من الصيف معتـار

هنا يخبر الشيخ تركي بن حميد الذويبي بان الدويش تراجع ونزل على حسو الرويقي 000 وعبر عنه بالشطر الاول
بقوله (( نسم النضو فوقه ) ) اي استراح وتعفى بعد الهزيمه والمقصود بالنضو هو (( الدويش ))

اما شطر البيت الثاني فا المخاطب فيه الذي ارسله تركي بالقصيده لذويبي


واسترسل قائلا

ليا قال ويش النضو يا للي تسوقـه = قله من ابن حميد يوصلك الأخبـار

صدر البيت وعجزه يخاطب فيه مرسوله اللي ارسله لذويبي ويقول قله هذي الاخبار من تركي بن حميد لان الذويبي بينشد عن النضو منهو
فقال له في البيت اللي بعده

رد البرا من فـوق عقلـه خنوقـه = وثور ظعنهم ناحرن عقلـة الجـار

يقصد الدويش عندما رد البرا وجاهم عتيبه على العويند


واخذ بعدها يوصف ما حدث في المعركه قائلا

جونا بجمع جـات علـوى تسوقـه = حمرً على ماوصف الخشم سنجـار
جونـا يبـون العـد والعـد فوقـه = ربعٍ مسقية العـدا كـاس الامـرار
خذنا الجمل والبيت والقيـن فوقـه = وتسعين لحية في حجا القوز ما سار
كم جادلٍ ريـح العويـدي نشوقـه = من عقبنـا قامـت تقلـط لقصـار

وختمها بتحذير الذويبي بعدم المشاركه مع الدويش واعادة الكره مره اخرى
حيث قال له

انه ضيف الله عـن الـورد فوقـه = مير أبتخص حتى تسمع بالاشـوار

وهنا المقصود ليس العويند المقصود نهي ضيف الله على النزول مع الدويش على حسو الرويقي ومهاجمت عتيبه على العويند

ولا تنسى ان العويند معركتين وهذه القصيده بعد المعركه الاولى وفيها نهي لذويبي بعد م المشاركه مع الدويش



هذا والله اعلم