الله يسعد مساءكم بالمسرات..
من حبي لكم و لهذا المكان واهله .. اقدم لكم هذه
المتواضعه ..... املاً ان تحوز على اليسير من اعجابكم..
الجو بارد والسماء كلها غيم =ونور القمر محجوب والليل حالك
صارن مغاتير الليالي مجاهيم = رحماك يامعبود جلاّ جلالك
الهم ياكثره ويا ما اكثر الضيم = ضاقت على الحيران كل المسالك
قامت تلاشا بالزحول الملازيم = كم واحد ٍ في كلمته ماوفالك
ياللي تقول الهم في قلبك امقيم = اقول ما انت بهالمشاكل لحالك
غيرك وغيرك فيه ناس ٍ مظاليم = معروف هذا شي حطّه ببالك
اصبر على ماجاك واعمل بتصميم = وعن الطويله لاتقصّر احبالك
ان كنت نايم يكفي النوم يانيم = صحصح عسى الخلاق يلطف بحالك
معروف هالدنيا حظوظ ومقاسيم = وعلى سوى الله لاتحط اتكالك
تاخذ نصيبك والعمل بالخواتيم = واللي يحسدك باالهناء ماينا لك
هل المشاكل با اتفاق المفاهيم = ماهوب حل اتقرّره من خيالك
تبغى النجاح اتبع جميع التعاليم = يمكن تحقق مابقي من امالك