ثم هذا رد الشاعر منصور الرمال على هايف المطيري والذي انتقص من قبائل الجزيره ومنها شمر يقول فيها هايف المطيري :
على الويلان ساعدنا الطنايا=وردينا لعظمتهم يقينا
وابن رشيد اخذنا جواده=وخذت في ملك فتنان سنتينا
الــى ان قال:
حاربنا كلكم عشر القبايل=وعبرنا نجد منكم ما انثنينا
واكلنا راس عباس الظفيري=وياما روس من قبله كلينا
واتى الرد قوياً وكالصاعقه على الكذاب هايف المطيري من قبل الشاعر الفذ منصور الرمالي الشمري يقول وفي قصيده طويله اقتبس منها هذه الابيات :
بـديـت في ذكـر من فيه استعـينا....الـه الكـون في ذكـره بديـنا
عظيم الشان رب الخلق الاوحد... تعـالى الله خير الـخالـقـينا
الـهٍ حـرم الـظـلــم وتـوعــد.... تـوعـد بـالـعـذاب الـظـالـمينا
ومن بعد ذكره بدينا بالمثايل...تركت النقص واخترت الحسينا
واردالـرد لابـن نعيـم هـايـف ...واحـذر مـن يـذم الـغـافـلـيـنا
احـذر مثـل هـايـف كـل هـافي...يـتجنـب لابـشـرّه يـبـتـلــيـنا
يـتجنب كان هو يبغى حيـاته...ويـاويـله كان هو طاح بيدينا
يعيف الاوله هي والتوالي...ويـعـرف افعـالـنا لـيا من بـلينا
ويعرف ان الفعول فعول شمر...وشـمـر بالفعـول المثبتينا
انـا مـاذم حمـران الـنـواظـر...ولا انـا مـن يسـب الـغـافـليـنا
اخاف الله انا وادراء عـذابه…وعـسى ربي من الظلـم يحمينا
ولـكـن بـلانـي هـايـف اللي...ذكـر لـي غـلـبنـا غـلـبٍ عـليـنـا
بدى في ذمنا والبادي اظلم ....فـتل حبله وبالنقـض ابـتدينا
تمادى بالغرور وبالمذمه ...ظلم نفسه وجعـل حـظه دفـينا
غزانا الهيس بلسانه واخذنا...وذبحنا بالـكـلام ولا دريـنـا
ردي النفس مادري ويش اصابه...ولا ادري وشبلا الخايب علينا
ولا ادري وين ربعه عن كلامه...علامه ما لقـاله ناصحيــنا
قليل العرف مثل الورع ينصح...ولكن ما نصحوه العارفينا
ولا ادري وشبلا الجاهل تجاهل ...فعايل من لهم فعل يقينا
جهل فعل القبايل غير شمر...ويقول ان مطير نجم معتلينا
ولكن ما احد حسب حسابه... ولا لحسـاب من مثـل خـذيـنا
احـدّه وان بـنا بـيتٍ نهـدّه ...واذا عاند على خشمه وطـينا
اهينه لين ينسى بامس وينه...ولا يعرف اليسار من اليمينا
وينسى كيف ينضمن القوافي... ويتبدل زجره الماضي ونينا
الا يـالذيـخ وش خلاك تـكذب...وتـحـط نفسك بمقام الكاذبينا
تقول بكير ذبحت الـطـنـايـا...متى ذا صار ياابليس اللعينا
على كـيفـك تذبحنا بـزيفـك...بـزيف وكذب واوهام تغـزينا
ترى في كير ما ذبحت شمر ...خذيـتـو مثل ماحنا خـذينا
ولـكن اذكـرك بام الجماجم...بـهـا زدنـا عـليكم واعـتـلينا
هزمناكم بها اكبر هزيمه...وترى ما سلموا الا الهاربينا
بها صلنا وجلنا لين نلنا...ورجعـتـو خـاسريـن ونادمينا
تـندمتـو على حرب الطنايا...ورجعـنا للغـنايـم كـاسـبـيـنا
طنايا نروي الظامي من الدم...على رأس المعادي له حنينا
واذا يالهيس تجهل فعل شمر...سل التاريخ يعطيك اليقينا
وذا انـك ناسيٍ لـه مـاتـذكـر...ترى التاريخ يـذكر مانسينا
وسئل الاجواد عن تاريخ شمر...كبار السن واللي فاهمينا
يعـدون الصحيح ويقعـنونـك...واللي يخفاك منهم لك يبينا
هل الذمه هم التاريخ سلهم...ولو هم من عربك الاقربينا
تـركـد وانـشـد الـعـقـيل عـنا...قـبـل تـنظـم وبالقـيل تـهجينا
تقول مطير صارو عون شمر...علـى الويلان معنا قايـمينا
متى شمر طلبو العـون منكم...كـذبت ولا لـكم فضلٍ عـلـينا
ولكن قل مع ابن سعود قمتو...ومع مبارك وقفتو والـتـقـينا
وعليكم بالصريف الرعب خيّم...ورجعتو مع مبارك خاسرينا
اعـنـتوهـم عـلينا وانهـزمتو…عوينٍ خـيب ظـن المستعــينا
فلا نـلتو مديح ولا سلـمتـو…مثـل مـن عايـد يـم الـقريـتـينا
وتقـول الضغيمي شلتو جواده…وخذت في ملك فتنان سنتينا
اقول انت تهبا كاذب وكاذب…فلا شالـو عـموم مطير شـيـنا
كـذوب وبالخـطـا عـمدٍ تعـمد...لـعـنـك الله لـعـنـه كــل حــينا
تقول انه قـليل اللي غـلبكم...وتـقول في كـل وقعـه فايـزينا
ونسيت الغزوه اللي كد غزاها...حدا اللي بالحجاز مسيطرينا
ابن عون الشريف اسمه محمد...غزاكـم وين فعـلك مايبينا
ذكـركـم عن ملاقاه انـتحـيتـو...ولا تخفى عـليك ولا عـلينا
شواهدها قصيدة من عزاكم...ونفس النص موجودٍ لدينا
وغزانا والتقينا به بموقق...وحنا اللي ثـبـتـنـا ما انتحينا
تقابلنا وصار الصبح ظلما...يشيب من الفزع راس الجنينا
صمدو فريسنا تسعين ليله...سـنـاعـيـسٍ لضده مـاتـليـنا
وجت زوبع وطير العز غنا...اناشيد النصر للـصـامـديـنا
بذاك اليوم سمينا الطـنايا…طـنـايـا مانـهـاب لـيـا طـنـيـنا
طنايا مارضينا بالمهونه...ولا نـرضى المهـونه ماحـييـنا
طنايا الذل ماننزل جواره...على انفسنا المـذلـه مارضينا
طنايا وان نطحنا كل غازي...يتراعد خوف من يقبل علينا
طنايا من حربنا له ضربنا… نصب الويل فوق اللي يجينا
طـنايا نـارد حياض المنايا… اسـود بالـحروب مـجـربـيـنا
طنايا عنـدنا لـحـل القضايـا…حـرارٍ بـالـعــلالي معـتـلـيـنا
طنايا نـكرم العاني ونعطي…وعـطايانا الجلايـل لا عطينا
طنايا وان نصانا كل ضايم… يشوف العز من ساعة يجينا
فـكـم من واحدٍ جاء وزبـنا…زبـنا مسـتـظـيـم ولـه حـمينا
حمينا مـن لجا يطلب حمانا…ودحـرنا كـل غـدار ونـحـينا
طنايا يوم رماح الكون تخطي… تصيب رماحنا من به رمينا
طنايا فـعـلـنـا فـعـلٍ يـتّـرخ…ويـبـقى مـاعـلى الـبـيداء بقينا
تدارسه الاجـيال غـير حنا… عـظـيـمٍ لـو جـحده الجـاحدينا
طنايا هم سلاطين الجزيره…وهم الحكام في ماضي السنينا