أوراق شــاعــــر

[هلال العتيبي]

الورقة 40

جابك الحظ مدري كيف ومنين جيت=ياطبيب الخفوق وجرحه السرمدي
جيت مثل المطر شنّة ورنّة وصيت=في نواصيه برقٍ لامعٍ وبْردي
احسبنِّي نسيتك واثرني مانسيت=ساع شفتك وقلبي صار يعدي عدي
فز ماكنّ ودّه في ضلوعي يبيت=لولا انا ماسكن حدب الضلوع بيدي
قام يهبد بلا يمِّة وكنّه ونيت=سايقه ورعٍ اقشر والمرافق ردي
ذبّوا الريع والماطور مافيه زيت=وحطّموا كل شيٍّ فيه حتى البدي
مير ثبتّ في ميقافي ولا مشيت =وإلاّ انا لومعي حيلة لاجيك اجْهدي
ردّني عنْك مبدن راسخٍ به ربيت=ديني وعقلي وخوفي حدنّي حدي
ادري انّك بخير وفالحياة اهتنيت=كل هذا وربّي من دواع اسْعدي
فرحتي فرحة كويتي بنصر الكويت=يوم عاد لبلاده وادبر المعتدي
أنت نبراس في ضيّه كتبت وقريت=كلّ حرفٍ شجيّ وكلّ حرفٍ ندي
وانت بدرٍ على شلال نورك سريت=من ضياك استنير وفي سناك اقتدي
يارعى الله ليالٍ في سمانا بديت=مااعرف سهيل والزهرة ونجم الجدي
كلّما اشوفك ابدع لك من الشعر بيت=يوم كنتوا وكنّا والبساط احمدي
أذكر انّك على اقفال الضماير سطيت=واذكر انّك سرقت النوم من مرقدي

آخر تعديل هلال العتيبي يوم 17-Apr-2010 في 08:07 PM.