علي الثبيتي
ليت ابوحمدان ريح خاطره وعصابه= ماتعب فوق الذلول وروحت مجاني؟
ماخبرت الذل يدخل في قلوب عتابه= لين جا وقت الهياط وسلطة الورعاني!!
مرزوق حمدان العتيبي
ماتعبنا الا بدرب ٍ عز من يسعى به = وانت عينك دون زود ومن ورى النقصاني
شي ٍ يوديك للاحراج وش تبغابه = والمصيبه تجمع الصاحب مع العدواني
علي الثبيتي
اطرد الكذاااب لين يصك صرعة بابه=ودمغه بالحق لين يقول انا غلطاني!!
لو ابو مشعاب يومنه عطا مشعابه = ماعطاه لصقر كان اعطاه ابن عتقاني؟
مرزوق حمدان العتيبي
لادخلت السوق ميّز منهم الجلابه!! = وان لقيت ابضاعتك لاتحسب الاثماني
جرد سلاحك ورح للذيب في مرقابه = واضربه بالضربه اللي تشلع الحجاني
علي الثبيتي
كيف تسكت لاجل ترض العالم الكذاااابه= مالها ساير يابو منذر مع العرباني!!
والله الني مافكرت بلحيته واشنابه= نلطمه واندق خشمه من على الجداني!!
مرزوق حمدان العتيبي
كل جابه يالعتيبي تنتهي من جابه = وانته اللي عندك الحجه مع البرهاني
مار بالله كيف تقدر تقنع النصابه = لو مدحت امطير قالوا تكذب الجهناني !!
علي الثبيتي
جبت علم وراعي القاله يحسب حسابه= من لسان ابو عتابه مرجع العتباني؟
اهبلو راع التطفل قبل لايضرابه=لايحقق مقصده ويصير علماً ثاني!!
مرزوق حمدان العتيبي
نعرف اسراييل تشعم نارها الشبابه = مار حنا اكثر بلاوينا من الصدقاني
ياعلي ياسيفنا اللي بالقسا يعدابه = اخذها مني وكاله وانته من اخواني
علي الثبيتي
الخبل مايعرف الوسطى من السبابه=والصديق اللي مايصدق نحسبه قوماني!!
ياشبات السيف وانت سلته ونصابه=ذاخرينك للعدا ياسيفنا شاماني!!
مرزوق حمدان العتيبي
كل جرح ٍ لو تعفن ياجدون اطبابه = غير جرح اهل الحسد والنقص والخذلاني
ان حمينا البيت يبقى ماتطيح اطنابه = وان تركنا البيت طاح الطنب والعمداني
علي الثبيتي
من تلبس من ثياب الناس فوق ثيابه= من يشوفه قال هذا مكتسي عرياني؟
طاوعوني واردعو راع الردى واحزابه= لايقلط فالبيوت ملحس القدحاني!!