الله من قلبٍ نهيته ولا طـــــاع=يلعب به الهاجوس لعب المنازيع
متحيرٍ بأمرة غدى شمله امزاع= صبرٍ جميل ويرجع القلب ويطيع
قفت تجره خافظة روس الآصباع= ام الثمان الضيقات اللواميـــــــع
خلي من الخفرات ماهيب مهباع= ولاهي من السرد الطوال النعانيع
بطنه عفيف جاذبه طول الاضــواع =ركَّابها دايم بتل المصــــــــــــــاريع
ما شذبت بالزور طراف الأكــــــواع =لا ضكت العيرات تسبق على الريع
يا عود ريحانٍ غدى له تمريــــــــاع= تذري عليه من الهبايب ذعاذيـــــع
لا شفت زوله يجني القلب مرباع =لو ما حصل لي من قباله منافيـــع
عيوا بها عني قليلين الأسنــــــاع= اسباب ساس البغض ماهم طماميع
ادعي عليهم والدعا حيث مدلاع =ادعوا معي عسى تصيب المقانيـــع
ارجي عساهم للبلاوي والأوجــاع= من كل صادوفٍ تجيهم قوامـــــــيــع
الله يعرضهم من روس الأشـــعاع= ذريةٍ من محكمات المصــــــانــــيــــع
دخانها مثل القبيسي الا انـــــذاع= تآخذ على طرافهم بضع أســــابــيع
عند الأوادم هاجنينٍ وصـــــــــراع =طش الجماجم كالزبيدي مصـــــاليع
الله يعرضهم غضب كل ما طــــاع= من مزنة يرمي بردها صــــــوامــيع
هديمةٍ ما ضاح بالشوف لمـــــاع= يسوقها الغربي وشرقي رواديـــــع
تبحل فيهم القلب منهم ويرتــــاع= منها تضيع أفكارهم والمــــــراميــــع
يعلن بغالي سلعته كــــــل طماع =وتذهل عن المرضع قلوب المراضــيع
تآخذ ثلاث شهور والمزن ما مـــاع= والسيل حاير ما لقى له مطــــاليع
واليا غدوا مثل الطفل والنسم ضاع= يفتح لهم بالقاع درب وبواليــــــــــع
هفت غريق الموج من غير مرجــاع =من فوقهم سبع الاراضي شواميع
يضرب بهم وسم على كل الأنــواع= تشهر بهم كل المحطات وتــــذيع
يقول ايضاً :
البارحـه يــوم الأوادم مـرشـه=عيت عيـوني تسـتلذ الفراشـي
يامـل قلب طـوَل الوقـت غشه=والحـال مما بالفـؤاد متـلاشـي
عليك ياللي زرع قلبي تحشه=من عقب ماهو بين الاضلاع ناشي
ياورع يازملوق عشبٍ بدشه=غاذيه من غر السحايب رشاشي
ياورع عطني مـن ثنايـاك نشـه=لوبس من حمر البراطـم نواشـي
ترى الدسم يكفي منـه ذوق مشـه=والهزل ما نبغـاه لوهـو بلاشـي
هرجك على قلبي نقاريـش طشـه=احلى من الما للقلـوب العطاشـي
زولك ظريف وقمت عنا تخشه=وين انت قاصر ياقلـيل المماشـي
والبيض غيرك مثل حوش المقشه=وايا غزال الريم وايـا الخشاشـي
ورع صغير وشـد قلبـي وهشـه=هش الهواء ارض على جال طاشي
واومابي اوماي العصـا بالمنشـه=اوماي هجـن يبعـدن المعاشـي
ويقول ايضاً
كنت آخذ المرقاب عصر ومغباش=ولا شفت به زود عن اللي لقيت أمس
الله من قلب عليه البلا جاش =عده على جمر الغضا حامسه حمس
على حبيب صار للعمر حشاش =اللي طواني طي سيم على جمس
لا سلهمت بعيونها نصف الارماش =تنظر بحمر خدودها كامل الخمس
انعم من الديباج وابيض من الشاش =واحمر من التفاح وانور من الشمس
اصفى من الجوهر به اللون يهتاش=واطرى من الياسين تجفل من اللمس
ويقول ايضاً
الله يابرق سمر حال دونه = ناس حدوني عن حراويه لانصاه
يامل عين كن يلعب بنونه = راموس لاجي بداخل الجفن واعماه
امس الضحى لي ماقف تعلمونه = حار القدم في ماقفي ما اتعداه
اخيل براق تلاعج مزونه = ياليت من يقطع ظما الكبد من ماه
اهاضني ورع ضواحك سنونه = در وياقوت تضمه شفاياه
تكفون ياهل الورع لاتنهورنه = خلوه ياقف لين يكمل مراعاه
لا تزقرونه بالنهر تقهرونه=الله يقصى من على العمر يقصاه
ياويلكم ياناس وش تطلبونه=لاصار ميقافه على سبت ماطاه
خلوا صغير السن لاتزعلونه=يزعل عليكم ربكم ويتراضاه
انا هواي صغير ما يجونه = ورع عذاب اللي براسه مماراه
الف صباح الخير قزت عيونه = والف صباح مفلج ثناياه
والف صباح الخير صفة قرونه = والف صباح الخير وصفه وحلياه
زملوق عشب ناعمات غصونه = من قع سيله ما وطت به رعاياه
ياورع عطني من ثمانك نمونه=ريقك ليا منه غشى القلب غذاه
يحيي فواد يابساتٍ شنونه=مثل السحاب ليا غشى روضٍ احياه
« آخـــر الـــمـــشـــاركــــات »
03-Jul-2011, 09:10 PM
العرض العادي
