صكات الزمان للشاعر مصلح بن عياد الشلوي... - الهيـــــــــــــلا *** منتدى قبيلة عتيبة

بدر الشلوي · 25-Dec-2011, 12:46 PM

قصيده للشاعر/مصلح بن عياد الشلوي...

يا راسي أنته راس ما ترخيك صكات الزمان=أنا أشهد أنك راس يوم القوم تحسب روسها
وأنا أشهد أن الفرق واضح بين الآربع والثمان=يالله لا باركت فيها طلّعت مدسوسها
اليوم هذا يوم حفل ويوم عيد ومهرجان=واليوم ذاك أثّر على جلبابها ودسوسها
بالهون يا راع الحصان اللي ما هو مثل الحصان=راجع دروس أيامك اللي شيبتك دروسها
سمحان يا سمحان ما قطّع نحرك آلا البطان=ضاقت بك الدنيا وفاتك ظلها وغروسها
أبعد عن العكوز خلك ذيب تاخذها سنان=لحيتك لا ترخي عليها موس ما هو موسها
أحسب لعثرات القدم وأحسب لزلات اللسان=ترى ثياب الشر ما هو هينٍ ملبوسها
الزيف والتظليل ماله لا كيان ولا مكان=ما فاد عكفان الضروس آلا بقلع ضروسها
حنّا نحب الخير والفاجر يحب الأمتحان=وأليا بلينا نخلف العيّال عن هاجوسها
حنّا خوان وفي بعض لاحيان ما حنّا خوان=حنّا حبوس الأرض يوم أن الرجال حبوسها
حنّا ليا آومانا بشلفٍ كنهن الخيزران=أليا أستقرت فالنحر ما ردها آلا قوسها
حنّا ليا حمي الوطيس وحوّلوا بالجبخان=كم لحيةٍ نرخي عليها النافعي وندوسها
حنّا ليا ثار الملاح وقام للمرت أطّحان=الموت من زرفال بندقنا ومن نادوسها
واليوم في نعمه وآمان الله يبلغنا الآمان=ناسٍ وأنا عمك تبيع وتشتري بفلوسها
من يوم رخص الهيل يا مال الشحم والزعفران=والقوم وداها الحيا عساس غير عسوسها
خلك على راحتك في حرزٍ مكين وفي ضمان=واللي يدق طبولها واللي يدق جروسها
بيني وبينك علم واضح ما يبي له ترجمان=طال الزمن وآلا قصر روس الرجال تروسها

العفريت · 25-Dec-2011, 01:20 PM

بيض الله وجهك على ايراد هذه الدرر لمصلح بن عياد

احب ان اطلب منك بعض القصايد بدون زعل

القصيده التي مطلعها

البارحه عيني عن النوم صايمه ...

والقصيده اللي يعد فيها الرجال

منها

رجل لمن الجماعه بدو به ..قال اسمحوا لي عمري اليوم مسخون

والعلم هين ماعليكم صعوبه ... وانتم تراكم فاللوازم تسدون

وشكـــــــــرا