أوراق شــاعــــر

[هلال العتيبي]

بالهون ياللي ترمي الناس بالهون=تحذف عباد الله وبيتك زجاجي
الناس مثلك تملك ايدي ويرمون=رمايهم لو يختبي فالمحاجي
عاد انت ياللي كل يومٍ ولك لون= فرقا لعلك للخلا والهجاجي
في ظني لسانك كبر صرح فرعون=ليت الزمان يجودلك بالعلاجي
ياليت فالاسواق ينباع صابون=حصري لقلب عتمته ليل داجي
وانا احمد الله باني قلاع وحصون=ماصابها صلف الهوا بارْتجاجي
شيدتها فقلوب ربعٍ يرومون=سلم الرجال ويقطعون الفجاجي
واليا نصاني علم راسي وموزون=مانيب ريشة في مهب العجاجي
حظي صقر والشكر لمدبر الكون=من خلقته ماطاح بين الدجاجي
م امشي ورا غرات صاحي ومجنون =ولااشكي الا للكريم احتياجي
(ماني بمن ياتي على شان يدرون)=آتي على كيفي واروح بمزاجي
الله وهبلي عقل ولسان وعيون= عيني تقديني وعقلي سراجي
مااخاوي الجاهل ولا اصاحب الدون=ولا انعزل واعيش في برج عاجي
بيني وبين اهل النقا درب مصيون= مابه دحادير ونشب وانعواجي
كم صاحبٍ غالي على قلبي يمون=يشرقله احساسي ويضحك حجاجي
دايم مكانه فالمعاليق مضمون=ماهو على ماقالوا انسان لاجي
واهل النقيليات لوكان يحكون=انا بطبعي مااشرب الما الهماجي
ماهمني في غيبيتي وشيقولون=حسب الثقة فالنفس عارف خراجي
ثم اطلب الله رحمته واطلب العون=ياآرب زيًن منهجي وانتهاجي
الكامل الله واكثر الناس يخطون=والمسعد اللي من خطاياه ناجي
وازكى السلام ورحمة الله مليون=كثر الصباح وما ابتدا بانْبلاجي
صلوا على الممدوح فالكوثر ونون=ذكرى النبي تملا الصدور ابتهاجي