مصافحه اولى

[ماجد متعب الدغيلبي]

اسعد الله مسا الجميع بكل خير وبركه

اليكم هذه المتواضعه وهي تعتبر من البدايات والنقد مقبول

والله ثم والله يستار اكاديم=مافيكم اللي يمه القلب هاوي
لو أكثر العالم عليكم مغاريم=فانا غرامي منتحله نحاوي
انا غرامي ياعرب يامغانيم=شوفت وليفً ماللجرحه مداوي
اللي لياجيته وأنا قلبي مهيم=رحب وحيابي بقلبٍ نقاوي
رحب وحيابي تحيه محاشيم=تحيةٍ فيها شذى المسك حاوي
من شوفته ينزاح عن مابي الضيم=وفي غيبته كني وحيدً خلاوي
له منزلٍ عالي تعلا على الغيم=بعرض السماء يشدي لنجمٍ سماوي
نجمٍ ضهر واخفا نجومٍ معاليم=وراح الوحيد اللي على الكون ضاوي
الجادل اللي سمت القلب تسميم=بين الحنايا مثل رمح العطاوي
تربعت فوق الضلوع المحاديم=وأركت على روحي لهيب المكاوي
حوت جمال وعقل مامثلها ديم=فالحضر والا في جميع البداوي
الياقبلت يمي بروس المقاديم=تقول فالممشى تعد الخطاوي
مابين تأخيرٍ ومابين تقديم=مشينٍ كما مشي الحمام الهداوي
واليا ادبرت فيها تعضمت تعضيم=باسباب ردفٍ يطوي الثوب طاوي
وان سلهمت بالناعسات النواعيم=سود العيون مغربلات الهواوي
اللي هدبها للمنايا مساهيم=لاصابت العاشق ماترحم وتاوي
في عينها اليمنى رموز وطلاسيم=طلسام سحرٍ فيه سبع اللغاوي
وفي عينها اليسرى سيوفٍ مصاريم=بيمان ربعن يحتمون الجلاوي
وان وقفت قدمي علي الملازيم=ماعاد يقوى القلب والروح قاوي
غرون عذابه فيه رقه وتنعيم=لاواعذابي منه ذقت البلاوي
يجرح ويقتل بالثمان المباسيم=اللي كما الياقوت بين الشفاوي
لرخت وشالت عن طرفها الملاثيم=وقامت تدلع بالغنج والغناوي
اصبحت ثابت بس مالي مكاليم=واحالي اللي قام يطويه طاوي
في وصفها جف الحبر فالمقاليم=وفي ذكرها ضاعوا شيوخ الفتاوي
وفي هرجها نغمات عود وتقاسيم=وفي صمتها يلوي هل الحسد لاوي
وفي خدها برقٍ مزونه مراديم=برقٍ شلع ماخايله كل شاوي
وصدرٍ على سطحه نهودن مواريم=حبات تينن ناضجاتن رواوي
من تحّت عنقٍ كنه معنّق الريم=ريمٍ علا عال النوايف رباوي
وجسمٍ تمايلبه خصوره مهاضيم=توه غضيضٍ هش غضٍ غضاوي
يكساه شيالن تعدى المحازيم=اسّود حريرً فوق ردفه رهاوي
لآفلته في داخل الحفل يادحيم=قامن بناته يلبسن الغطاوي
الحب بلوى والليالي مضاليم=والوقت قطعبي حبال الرجاوي
ودي بقربه مع سلامن وتسليم=والبعد دونه واشهب الذيب عاوي
اسمه نقشته من حروفٍ مياتيم=نقش الذهب في بشتن اشقر حساوي
اول حروف له يجي قبلها الميم=وآخر حروفه بين نونٍ وواوي
قلته وانا والله ياستار اكاديم=مافيكم اللي يمه القلب هاوي

[مرزوق حمدان العتيبي]

...
.
مرحبا تراحيب المطر ياماجد
شرفت المنتدى ..
وفي الحقيقه انت ...........
شاعر وولد شاعر ولاهوب غريب عليك الابداع
صح لسانك ياجزل .. قصيده رائعه بكل المقاييس
والملاحظه الوحيده .... هي انك فالبدايه خاطبت المحبوب
بصيغة المذكر ثم بدأت تخاطبه بصيغة المؤنث وكان الاجدر
ان تستمر على احد الحالتين لانه
يعتبر خدش لجمال القصيده ....
مودتي
.....

التوقيع

فدوة ٍ للمصطفى روحي وماتملك يميني = كيف (لا) واللي خلقني حط حبه في كياني حط حبه في كياني ماتغيّره السنيني = وانثني من دون عرضه بالذراع وباللساني @Marzouq_MHD

[فيصل المسعودي]

حياك الله ابو متعب


في البدايه


ارحب بك اجمل ترحيب في موقع عتيبه الهيلا


انتسابك ضمن مجموعة اعضاء الموقع يزيدنا سروراً


متمنين لك طيب الاقامه عندنا ودوام الفائده والمتعه بيننا


وصح لسانك على هذه الرائعه


التي صافحتنا بها في بداية مشوارك في منتدانا


ونحن في انتظار جديدك بكل شوق


شكري وتقديري


أخوك


فيصل النفيعي

[مخلف الهقاوي]

ماجد .. الله عليك يابو متعب

رائعه بيض الله وجهك

وصح لسانك..اما بالنسبه للنقد استاذنا مرزوق عطاك العلم اللي

مابعده وحياك الله بين ربعك واخوانك وننتظر جديدك

[خالد المقاطي]

ياسلام ياسلام


ابداع ابداع ابداع

غيــــــــــــــر

مستغرب

.............

ملاحظه اخوي / مرزوق صحيحه ولاكن لاتعيب القصيده والقصيده بشكل عام في غايه الروعه

...........

صح السانك مدد بلا عدد

وشرفتنى في منتداك بين اخوانك وربعك

ونشكرك كل الشكل على الرائعه اللي قدمتها

ننتظر جديدك دائمآ

اتركك بود