قصايد عن كيف القهوه

[ابن البجاديه]

كثيرا مانسمع عن القهوه في قصائد كبار الشعراء

ونبدأ باشهر قصيدة بالقهوة وهي قصيدة دغيم الظلماوي ..

يا كليب شب النار يا كليب شبة ..... عليك شبة والحطب لك يجابي
وعلي انا يا كليب هيلة وحبة ..... وعليك تقليط الدلال العذابي
وادغث لها يا كليب من جزل حبة ..... وشبة ليامن غفى كل هابي
باغ ليا شبيتها ثم قبة ..... تجذب لنا ربع سرات غيابي
بنسرية يا كليب صلف مهبة ..... لانسنست لياكن به سم دابي
سراة بليل وناطحين مهبة ..... متنكفين وسوقهم بالعقابي
خطو الولد لوله زبون وجبة ..... ياتي عليهم من حساب الزهابي
لاباطن الهلباج خطو الجلبة ..... يا حلو خبط عصيهم بالركابي
اطمر لهم وابدي سلام ومحبة ..... لاجو على هجن يديهن خرابي
بسلام احلى من شخاليل جبة ..... واحلى من السمن الجديد العرابي
مع كبش مصلاح لك الله نجبة ..... لا دبر الهين كبير العلابي
الوالمة يا كليب عجل بصبة ..... والرزق عند اللي ينشي السحابي

ويقول ابن حثلين
يا محلا الفنجال مع سيحة البال ..... في مجلس مافية نفس ثقيلة
ويقول تركي بن حميد من قصيدة طويلة
نومك طرب وانا بنومي هواجيس ..... ماسهرك بالليل كثر الهمومي
اسهر ليا نامت عيون الهراديس ..... وبالليل اراعي ساهرات النجومي
قالوا جهلت وقلت جهل بلا قيس ..... الجاهل اللي ما يعرف اليمومي
اشوف عدلات الليالي مقابيس ..... ولاحد من الدنيا عظامة سلومي
الى ان يقول
يجلي صدى قلبي ضبيح المهاريس ..... لا قام شراب الحشايش يعومي
ودلال فوق النار دايم مجاليس ..... اكرامهن حق علينا لزومي
من صنعة الصبة وخمس التحاميس ..... برية يعمل بها كل يومي
وبهارها هيل بليا حواسيس ..... وكيف يعدا للنشامى القرومي

ويقول خلف بن دعيجا
يا شارب الكيف الحمر سو فنجال ..... ترا المراجل ساسها نية الخير
فنجال خطو الغشمري يشرح البال ..... وقت الضحى لا قربت حومة الطير
صبه على شيالة الحمل لو مال ..... زمل الصخاني ما تهاب المخاسير

ويقول دبيس بن مهلهل
وادلتي واقو صبره علينا ..... خمسين عام ما فهقتة عن النار
صبة على اللي لا ركب يتبعونة ..... لانفظواعقب العواني بالانكار
وعده على اللي دايم ينحرونه ..... اللي يشببهم لياجوه خطار
وعده على اللي لابته يمدحونة ..... فكاك تال القوم كان الدخن ثار
واقصر عن اللي ماتعدد فنونة ..... مهو على طرق المواجيب صبار


ويقول ابراهيم بن ربيعان
ياما حلى وان حاشك الليل وامسيت ..... والصبح قمت ليانت بارض بياحي
وصبيت من ما الشرب ثم توضيت ..... وذكرت منهو دايم الدوم صاحي
وشطرت نارك للمعاميل شبيت ..... والارض له يومين عليه رواحي
وحمست ما حاشن يدينك ودقيت ..... بنجر طلوع الشمس صوته صياحي
تطرب لصوت مونسك بالتصاويت ..... ياما حلى صوته بهاك النواحي
وسويت فنجال على شربة اشفيت ..... يغدي العماس ويودع الراس صاحي

[ممدوح الروقي]

يسلمووووووووو على الابداع في الاختيار يابن البجاديه

[ابن البجاديه]

اخوي ممدوح الروقي شاكر مرورك

[محب الهيلا]

مشكور وماقصرت على القصيده

[فهد النفيعي]

لاهنت على النقل يا ابن العم

[ابن البجاديه]

محب الهيلا
فهد النفيعي
شاكر مروركم

[الزعيم الهلالي]

يسلموووووووووووو على هذا الطرح الرائع


لك أرق التحايا

[ابو عبد الله العتيبي]

مشكور الله يعطيك العافيه

تقبل تحياتي

التوقيع

[ابن البجاديه]

الاخوه الكرام
الزعيم الهلالي
ابو عبدالله العتيبي
شاكر مروركم

[النخيــــــش]

مشكور على القصايد

ويعطيك العافيه