القصيده التي كان سيشارك بها بندر المحيا

[محمد مطلق العصيمي]

والله يابو ضحكة ٍ فيها نهاريـن =قبل اتكسّر على صورتك الأوزان
لقيت فيها السما والأرض والطين =وتاريخ غامض بلا معنى وعنوان
فـ خيوطها ثرثرة شاعر وقافين =وبحر ٍ تحت زرقته لولو ومرجان!
وفيها من التوت مايغريك يالتين =ومن الثمر لاتدّلى عَقْد رمّان
وفيها العنب سلسل غصون البساتين =يوم البنفسج تحضنها بالاحضان!
سْقوفها من زبرجد طـّل مابين : =ستاير ٍ ما حكت للريح نسيان!
يسولف السمع فيها جنب ليلين =لين اختنق شمعدان وطار دخان!
فيها تلّفت يسار وعينك يمين =وعلى التفاتـك يصب الغيث ودان
وعلى شفاهك تلعثم حدّ سكين =وخيانة الأحمر النافر للالوان!
كن الخشب في براويزه ربيعين =وأنهار وأعشاب في صدري وهتان
يحرث بها الظل حبـْر وتزهر يدين =ويحفر لها الحلق صوت وينطق لسان!
وتجلس وفي جلسْتك يبيّض نسرين =وتاقف وفي وقفتك ينهار وجدان!
وكم حاجبك عقّل هْبَال المجانين =وكم هي رموشك تجَغْرف بيد و أوطان!
وكم رغّدت خدك عْيون الفقيرين؟ =وكم في عيونك سَرح طرقي وهجّان!
ماقلت في صورْتك حرب ومعادين =ولاقلت فيها رمي بندق ونيشان
أقول فيها يزغرد صبح ويبين =وأطير فيها ..سما..من غير جنحان!
أو قل طريق ٍ تواعد فيه قلبين =واحد نسى قلب واحد كان ولهان!
لين احترق فـ انتظاره وامتلت عين =وانهدمت ضلوع في صدره وجدران
وياهي ملامحك يشربها الغريبين =ومن أربعين الشبه ماتشبه إنسان!
أشوفها اصْدق من دموع المساجين =اليا اطلبوا رحمة ٍ من كف سّجان
وأحس لاشفتها تاقف بي سنين =وإن جيت بـ اصد عنها..تمضي ازمان!
وأشوفها جملة ٍ مابين قوسين =تفسيرها الدمع والحيرة والأحزان
شبّرتها ماتجي بالطول شبرين =لكنها السرمدية بعض الاحيان
وباقي من الثلث ليل وراح ثلثين =وأنا اتدّفى على صـورتك بردان
سامرتها وانفجر شاعر وصدرين =ومْن الوله والحنين ارتبكت أوزان
لين نْعَسَت عين..وشوي نْعَسَت عين =ونمت وتركتك تحاكي صمت الالوان!

منقول من منتديات بندر بن محيا

[نواف العصيمي]

يعطيك العافيه وتم تعديل تنسيق القصيده

ولك التقدير والإحترام

التوقيع

[محمد مطلق العصيمي]

مشكور نواف


وياليت تزودنا بالرابط إذا كنت تعرفه

[نواف العصيمي]

.. على خير ياوجه الخير ..طيب لاعاد تسبقني ترى ما أعاد أعطيك شي

تم تثبيت الموضوع

ولك التقدير والإحترام

[فيصل القرماني]

الله لا يهينك

[فـارس عتيبه]

لا هنت على القصيده الجميله


شاعرر كبيــرر بنــدرر


بس لو كان يكتب قصايد حميٌا بالحلقات السابقه . يكوون أفضـل



يعطيك العافيه يولد عاصم


. وبندر كان عنده منتدى قبل . وأنا عضو فيه بعد !!


بس فرمت الجهاز . والرابط مدري وين راح !!


.

[ابن سعّيد]

الله لا يهينك وقصيدة جميلة

[عبدالله بن دبيس العتيبي]

سوف ينظم بندر بن محيا الى اخوانه محمد الحويماني وخالد العتيبي الذين حملوا بيارق قلوبنا ولن ننساه مادام عرق الشعر ينبض




والف شكر ياخوي وصح اللسان الشاعر الرائع بندر




وتقبل تحياتي

[بـرق الـذيب]

قمة الابداع الشعري

والشعور الصادق المطرز بالعاطفع الجياشه ونضوج التجربه

والملون بتلاوين الشعر المتناسقه


أعترف حقا بعجزي عن التعبير في إعجابي بهذه الوحه الشعريه

والتي تضاهي لوحة الفنان التشكيلي (بيكاسو)تقديري وإعجابي ,,,,,, يابندر

[نجم الغدرا]

الله لا يهينك ومشكور على هذه القصيده المنقوله