عتيبه ..والتكتلات

[أبوضاري]

هذه قصيده للشاعر الشيخ الفارس تركي بن حميد رحمه الله
ويتضح بالقصيدة التحالف الكبير الذي ضم جميع القبائل بلا استثناء على عتيبة..

ياسابقي صكوا عليك القبايل =الحضر والبدوان راحوا نحية
قومن من العارض اليا سوق حايل =لاقرب جد ولابهم مرحمية
قامت تروجن بينهم بالشلايل =تعاونوا عقب النقا بالحمية
ياقومنا لاتكثرون العذايل =اشوف لي شق توسع رفيه
ياعنك جتنا من عزيز القبايل =حكام نجد القطع الصيرمية
لو انها من نازحين الحمايل =ماسلت لو شرَه تلاحق ضوية
العمر بيد الله منشي المخايل =حق على الراعي صلاح الرعية
نرد الخطر والعمر لابد زايل =عقب الخطر نشرب ركايا عذيه
إن كان مانرخي رقاب الاصايل =والا منازلنا غدت جاهلية
بدهم الفرنج مطوعة كل عايل =فودن لنا ماقط جتنا حذيه
ومصقلات تودع الراس مايل =من صنع مفراص وساع هويه
إن كان ماترَث يدينا فعايل =يحرم علينا شربة ( الشاذلية )
والزعفران وحب سمر الجدايل =وحط الشحم وسط البيوت الذرية
الحرَ لاصكت عليه الحبايل =يشهر وتاتي له من الله فضية
عاداتنا نروي حدود السلايل =بإيماننا في محتضر كل هيَـة
حريبنا يسهر ونومه ملايل =وألي نسى يوم نجدد كويَـة
وصلاة ربي عـد مازال زايل =على نبي الدين سيد البرية