من صوب وادي عبقر اللي عربدت فيـه السيـول=اللي ليا هبت عليـه الريـح صـار لهـا صريـر
مثل الربيع الطلق اتيت اختـال مـا بيـن الفصـول=في كل نقطة حرف ما في كـل قطـرة مـا عبيـر
اصابعي خمسة سنابـل خضـر وكفوفـي حقـول=واوراقي البيضا طيور وكـل سطـر جنـاح طيـر
شاعر فحل من قشر حظي عشت عصر اللا فحول=اجمع شجاعة عمـر بـن هنـد وثقافـة شكسبيـر
لو ترسموني خط عرض ارسم لكم خطيـن طـول=الشمس تشرق من يـدي والارض حولـي تستديـر
اقدر بسحر الحرف اغيـر كلمـة علـوج لعجـول=يعنـي بخفـة يـد ارد الثانـي بــدال الاخـيـر
يا أيها الناس :اسمعوا منـي واعـوا مـاذا أقـول=هـذا بلاغـي: أن تقولـوا مـا أتانـا مـن نذيـر
إنـي نذيـر لكـم لـو انـي لا نبـي ولا رسـول=انسان اظن الخير في نفسي وفيمـا اقـول خيـر!!
ان كنت اقول الحق اعينوني على وضـع الحلـول=وان كنت مخطي عدلوني زين با السيـف الشطيـر
من منكم بلا ذنب يا اصحـاب البصايـر والعقـول=فليرمني با كبر حجر فـي ساحـة النقـد الكبيـر!!
والله مالـي مـن وراكـم لا بعـيـر ولا ذلــول=احلامي اكبر في حياتي مـن ذلـول ومـن بعيـر
لكن ارى ما لا ترون مـن الامـور اللـي تهـول=اللي تهول وشيبـت راسـي وانـا تـوي صغيـر
شفت العجايب والعجيـب ان الطبيعـه مـا تـزول=اعور يقود اعمى وراه اعمى يقّـود لـه بصيـر!!
اعور يقود اعمى تساوى الرفض فيهـا بـا القبـول=اللي عجزت القى لهـا حـل المفتـح والضريـر!!
وامير في جلباب شعر يعيش لـه خمسيـن حـول=ويموت خمسين الف شاعر في طرف جلباب امير!!
قصرت مقاسات الجبال وطالـت قـرون الوعـول=يا وقت قصرت الطويل وزدت في طـول القصيـر
لكن حبل الكذب يقصـر لـو يزيـد ولـو يطـول=لو ينفتل من سر غامض مـا يحفظـه قـاع بيـر!!
قلنا الضمير يعيـش والغمـه عـن الامـه تـزول=لا زالت الغمـه عـن الامـه ولا عـاش الضميـر
نبكي على سقط اللوى ما بين حومـل فـا الدخـول=ويضحك علينا طرفه بـن العبـد ويصفـق زهيـر
والنقطة اللي فوق حـرف الضـاد مالـت للذبـول=وان ذبلت النقطه ومالت صار حرف الضاد غيـر!!
يوشـك يجينـا وقـت يتسيـد علينـا بـن سلـول=ويصيـر حكـم الابجديـه عنـد تجـار الشعـيـر
هم دنسوا باسم المكاسـب مريـم العـذرا البتـول=ثم احرقوا في قرطبه تمثـال موسـى بـن نصيـر
وش ننتظر منهم وشمس الشعـر توشـك للافـول=لا معهـم اسفـار الهلالـيـه ولا حـنـا حمـيـر
وان طاحت الرايه وداست فوقهـا اقـدام المغـول=لا تسألونـي وش يصيـر؟ الله يعلـم وش يصيـر
هبوا واعدوا ما استطعتم لـو مـن ربـاط الخيـول=يا الطيبين احفـاد ابـو الطيـب وبشـار وجريـر
صيحوا مثل صيحة مضر والا اعقدوا حلف الفضول=والا انطحنتوا في رحى يـوم ٍ عبـوس ٍ قمطريـر
تحرروا من عقـدة المنصـب ومـن دق الطبـول=اول عمل في درب الاستقـلال :تقريـر المصيـر
اعلام صار اعدام صار اوهام مدري ويـش اقـول=هذا بلاغـي: أن تقولـوا مـا أتانـا مـن نذيـر!!!
« آخـــر الـــمـــشـــاركــــات »
العرض المتطور
