حطّت لــ "اريسكون" فـ : رقبتها عراوي

[وصل العطياني؟؟؟]

السلام علاكم

كل عام وأنتم بـ " خار "

سبحان ربٍ بدّل الحال بأحوال=وكشف لنا فـ "البدو" بعض الدعاوي
من يوم جاء في "مدركة" برج الإرسال=راحوا على الجوّال بلوى االبلاوي
تسابقوا للسوق رجلي وخيّال=صاحي ومجنون وفقير وغناوي
تسمع لهم عند المحلات ولوال=والاجهزة ما خلوا إلها شلاوي
تقول واحدهم من الامر مهتال؟=ماهو مصّدق مدري أمرٍ سماوي
حتى ليا صلّى يخليه شغّال=وليا تربّع فوق وارد عراوي
وليا جلست بمجلسٍ فيه عقّال=وانته على زين السوالف شفاوي
ما عاد تسمع من تكلّم ومن قال= ما غير جوالاتٍ إلها تعاوي
والمشكلة لن كان لبّاسة الشال= حطّت لــ "اريسكون" فـ : رقبتها عراوي
وحتى العجايز كل وحدة بجوال=ولا ياخذنّ إلا الجهاز الغلاوي
حي الجهاز وحيّ حتى الكريستال=والوانه الوردي والازرق سماوي
لو إنها خسارةٍ في هالاشكال=ولا يشتريه لمثلهن غير غاوي
والقصّة اللي ما تصوّر على بال=و يتوه في تفسيرها كلّ راوي
معي ثلاث أرقام يا ساتر الحال=عندي عدمها والوجود متساوي
والهرج مهما كان يسمج ليا طال=وما قلّ يكفي عن كثير الحكاوي
جهازي الاول يقولون بطال=وأنا شريته مار ما كنت ناوي
وسافرت لابو ظبي انا ومعي رجّال=من روس ناسٍ يبعدون الهقاوي
طلبني الخوّة ووافقت فــ الحال=وإن كان ما اخاويه من عاد اخاوي؟
وبعد قضينا ف السفر بعض الاشغال=جينا لدار مريّحين الشقاوي
وقابلت في الجمرك ردييّن الأعمال=واحد قريت إسمه .. يعوّد حساوي
قالوا جهاز "الباندا" ماض الافعال= قد اصدروا فيه المشايخ فتاوي
لازم يصادر منك يا طيب الفال=وإلا تبيعه كان للبيع هاوي
وليا هذاك الرجل أبو ثوب وعقال=عطيته القصّة وكنّي حياوي
قال إحمد الله , هاك تسعمية ريال= من عند غيري ما تجي بالمناوي
قلت الخسارة نص من روس الأموال=لكنّ انا ما احبّ كثر الرجاوي
" ريح الشّياط ولا العدم " مثل ما قال= راع المثل... حزّة قنص بالنداوي
شيله و رح يالخال حق إنك الخال= تراه يصلح لك إذنـّك هواوي
وجبت الشريحة , مار بعد أربع ليال=ضاعت وصار الجرح ماله مداوي
وجهازي الثاني غدا عند نشــّال=وجهازي الثالث طرحته سهاوي
ما اخبر جهاز اخذ من هلال لهلال=لازم يجيه من الصواديف لاوي
اما طرحته وإنه مروّح أوصال=وإلاّ انسرق واخفوه بعض الضناوي
حظي كذا من عام الاول ولا زال=ما فادني كثر المنى والعزاوي
وحظّ الرجل ما ينتعدّل ليا مال= لو قام من قبره بخيت العطاوي

التوقيع

na111na@hotmail.com

[الــوآفــي]

هلا وصل

صح لساااااااااااااانك


قصه وقصيده في واحد وابشر بجوال وبشريحه

تحيااتي لك

[ولد روق]

لا لا لا
أنا عندي أعتراض على هالقصيده يا بو مشهور ..
خاصة في الابيات اللي تصف أهل مدركة ....

قصتك قصة مع الارقام والشرايح ، وانا ترى ما اباعدك ..
لو خلونا على اللاسلكي "ايكوم" افضل من الجوال ..

تسلم على هالقصيدة ..

[فهدمتعب الجعيد]

كل عام وأنتم بـ " خار "

صح لساااااانك
تسلم على هالقصيدة

[الخــراص]

صح لسانك يأبو مشهور

ولاهنت

وأبشر بالعوض

أزهم صاحي يجيك مجنون





الخــراص

[((الدلبحي))]

حظـي كـذا مـن عـام الاول ولا زال
مـا فادنـي كثـر المنـى والعـزاوي
وحظّ الرجـل مـا ينتعـدّل ليـا مـال
لو قام مـن قبـره بخيـت العطـاوي

ابشر بسعد ياوصل
وصح السانك مليون

تحيااااااااااااااااااااتي

[مروي العطاشا]

صح لسانك أخي وصل العطياني

أبدعت في الوصف والله

أعجبتني كثييييييير

تحياتي العاطرة لك

[عالي مستواه]

صح لسا 111111111111 نك
ياولد العم ( وصل العطياني )

رقم اورقمين ولا حتيش ثلاث ارقام
ابشر بالهاتف السعودي كله يلبالك

ولا عدمناك
................

[داهية عتيبة]

صح لسسسسسسسسسسسسسسسسانك يابو مشهور


وابشر بالعوض



ثلاث أرقام مميزة يالذيب




لاهننننننننننننننننت مليوووووووووووون


يادكتوووور الشعر


تحياتي ..

[وصل العطياني؟؟؟]

الغالي : ذيبان

صح بدنــك ..

وتسلم يالذيب ..


الجوال والشريحة مأخوذة مافورة


لا هنت يالقرم ..



تحياااتي