السلام عليكم
رغم تواضعها وتأخري في نشرها الا انني ارى ان لكم حق في قراءتها
قد لا توفي شيئا من خصال والدنا الراحل خادم الحرمين الشريفين الملك / فهد بن عبدالعزيز رحمه الله
ولكنها خلجات صدري نثرتها لكم شعرا
اتمنى تقبلها
اسمعوا :
الشعر مكنون الضمير ان كان غيض او كان فيض=وانا من امس احايل هجوسـي عجـزت احتالهـا
من شي بصدري قطع رجواه في بـدع القريـض=اصبحت مثل اللـي يتنـوّش حاجـةٍ مـا نالهـا
بث الخبر والصدر وقّـف عاجـزٍ عيّـا يهيـض=ولا كبرت الحمله على ظهر الجمـل مـا شالهـا
بث الخبر بالمنطق المشـؤم والوجـه البغيـض=لا بـارك الله فـي قنـوات الفضـا وارسالـهـا
جرتنـي الونـات بحبـال المفاتـل والنقـيـض=وتسابقت زفرات صـدري والدمـع يبـرى لهـا
ضاقت صدور وصار وسط قلوبها حزن وغيـض=وغطّى بلاد المملكه حـزن .. ولاهـي بلحالهـا
امسى جسد الامه من الغمه على موتـه مريـض=كـل العـرب والمسلميـن بحالـة يرثـى لهـا
بلعون راح الفهد نبـراس المواقيـف الوميـض=راع الصفـات الطايـلات المتعبـه مـن طالهـا
للملك مرسى للعرب منصـى وللجـودا حفيـظ=كل الصفات الطيبه كنّـه مـا خلـق .. الا لهـا
ياخذ من اسمه سطوته ... والحق بالخط العريض=انّـه ملـك كـل الملـوك قصارهـا وطوالهـا
لاشفـت مداتـه وجـوداه وعطـاه المستفيـض=اقول غيره مـن كـرام النـاس وش خلّـى لهـا
ان رضي فمزونٍ تصب الغيث وبحـورٍ تفيـض=وان ضاق فجّر فـوق هامـات العـدا زلزالهـا
هذا وانا يوم اطلب وصوفه على عجزي واهيض=فانـا شبيـه اللـي يتنـوّش حـاجـةٍ مانالـهـا
ادري انّه الفهد اعجز الشعار في بـدع القريـض=ولا كبرت الحمله على ظهر الجمـل مـا شالهـا
يالله لعلـه فالقبـر منعـم وفالجـنـه حظـيـظ=بفردوسهـا وانهارهـا واشجـارهـا وظلالـهـا
مع الانبيا والصالحين .." ولـه مقـام مستعيـض=بالخير ".. واجعل منزلـه يـارب مـع منزالهـا
ولا لنـا غيـر انـت يالله ياكريـم ويامعـيـض=لا خذت لك حاجه من ابـن آدم تعـوض بدالهـا
ما مات فهد اللي فرض حبه على العالم فريـض=ولا اهتـزّت بـلادٍ تسامـى للعـلا برجالـهـا