التحاسيف

[فيصل الثبيتي]

السلام عليكم ...

إلى من اخطأ علي .. وعلى نفسه


*************

يا شيخ هوّن .. وش تبا التكاليف؟=اللي جهلك اليوم .. يفهمك بكره
بعض العرب لو كثّرت فالغطاريف=والشف في عشرة .. تجي فوق عشرة
ما حصّل امن الشف غير النتاتيف=حال الزمن .. ما بين حاشي وبكره
ما كل شي ٍ يستوي لك على الكيف=اخذ السوالف بين درس ٍ وعبره
لا تاخذ الموضوع بالرمح والسيف=انت (افـ) زمن يحتاج حكمة وخبرة
وانا رفيقك .. ما يبا لي تعاريف=فيصل ولد بادي .. ولي حق واشره
لو منت غالي ما جدفت المجاديف=وارخيت حبلي لجل خوّه وعشرة
مير البلا .. يوم اخذتك العجاريف=وارخصت في صاحبك قدره وشعره
ادنيت لجلك عاليات المقاطيف=وادنيت فوقك ظل من ظل شجرة
شفت العلوم الطيبة مير ما شيف=منك سوا مدت يدينك بتمرة !
عطية ٍ وحدة وعند العواريف=مثل الذي احرم ولا راح عمره !
وانا غناوي .. نظرتي ما بها زيف=اليا عرفت الذيب وشلون نظرة
وانته تعرف اني عدو التحاسيف=واسحب على اللي فيه شوفة وكبره
واكره رياجيل الكذب والملاقيف=واهل المصالح وابن درهم وفهره
وانت محشوم ٍ ما اجرفتك المجاريف=مار البنادم ما اعتلى فيه قصره
اما رفع قصرة على قمة الطيف=وارخى وشد وفيه عقل ٍ ودبره
ويميز رجال الفخر والمواقيف=اعن الردى واهله ودعّاس جمره
ولا لحقه امن المشاريه والحيف=شي ٍ يجي فالعظم ويحق كسره
يا صاحبي جتك النصايح مراديف=عقب العتيبي ما نفذ منه صيره
هذي هجوسي جتك يا مكرم الضيف=ضيف ٍ يجيب الخير .. وش قال فامره ؟

*************

وسلامة كل من يقرا ...