قصيدة (الوداعيه) للشاعر / محمد بن عبدالحميد المظيفري السلمي (أبو وحيد)
في شهر رجب 1428 هـ وقالها وهو في مرض الموت رحمه الله
ألا ياونتي ونيتها من داخل الاعماق =خفا ونيتها مبي القرابه تستمع فيها
أخاف اليا سمعها أقرب قريب يجيه حزن وضاق = وأنا ماودي البسمه تفارق وجه راعيها
شكيت أمري على الدكتور قال ان فالعمر لك باق =شكاويك اليا هذا اليوم ما يوجد مداويها
شكيت امري لمن بأمره يطير الطير بالمسباق =عليم امور خلقه كل بينها وخافيها
ابصبر فوق مابي لين تاتي دبرة الخلاق = وكلن دبرة الخلاق يعرفها وقاريها
وصاتي ياوحيد البيت بعدي لا يجيه رواق = تذرا في ذراه ومن تذروبه يذريها
وضيفك كمله لو في مواجيبه كسرت الساق =ترا الارزاق مده من جزيل المد يعطيها
تحمل في حياتك لو يجيلك فوق ما تنطاق =لا تطلب عون غير مكون الانفس ومحييها
انا قبلك قضيت الوقت في الدنيا عدي وسباق = تزعلني وترضيني وازعلها واراضيها
شربت المر فيها من يعرف المر ما ينذاق =شربته من يدين رجال معروفه باساميها
وانا ماني ذليل ، افضل الميته على الاخفاق =لكن ايامنا تبي الحكيم اللي يداريها
وخلك ميقن ان ايامنا فيها لقا وفراق = للانفس مقتدر حاكم يصبحها ويمسيها
اليا تباني ارضا عنك واهنا داخل الانفاق =اخياتك مع اخوانك وداعه وانت حاميها
وخلك مع بني عمك على كسب الوفا سباق =اليا صفوا معاهم صف لا تحسب قوافيها
وخلك في الوعد صادق ليا اعطيت الوعد ميثاق =امانه ثم امانه لا عطيت وعود توفيها
اخذ خبره من العاقل وخذ عبره من العشاق = وطوّع نفسك بحكمه ولا تتبع شهاويها
ليا شفت المخيله ذر قبل تشاهد البراق =ليا شاهدت بارقها امطرت والسيل قافيها
بعد تقوى الله وطاعت ولي الامر والاخلاق = ابوصيك بوصاية عود لعياله موصيها
لا تمشي بالخلا الا بالسلاح مخضع الاعناق =ترى الدنيا تبلوا اللي ما يحذر من بلاويها
ما يزها البيت مالم النمش في مجلسه معلاق =ليا نادى المنادي درع واقي دون راعيها
ثلاث من افضل اللي صنّعت في ألمانيا وبراق =مورثها لك ولأخوانك من السوق شاريها
عليها دمغة المنتج ليا جت حزة الاطلاق =ليا لقْيت خبير عيارها تشهد لراميها
قراها يوم يكشف عن قراها له وميض اشراق =يشوق عيون ناظرها ليا طلعت مخابيها
مداها الفين متر مسجله بالجنب بالدقاق =ولن درّجت في نيشانها زادت مراميها
مدام الوقت امان آمن لها في الامن ما نفتاق = ولن جا في الامور امور يكبر حظ قانيها
تعيّن في العراق اللي بعد ظلا نعيم ، احراق = سبب هقوات بوش وشرذمه الشيطان مغويها
نسبنا من بني عايض عيال مظيفر العملاق =عيال سليم بن منصور ناخذها ونعطيها
نجيب حقوقنا عنوه وطيبه نعطي المغلاق =لنا صفحات في التاريخ كل سليم ترويها
هذا موجز من النشره وباقي للعلوم الحاق = تعلمها بنفسك من يدورها يلاقيها
وأختمها بذكر الله وذكر الهادي المصداق =عليه افضل صلاة الله على خلقه يصليها
رحمه الله رحمةً واسعه وأسكنه فسيح جناته
آمين
« آخـــر الـــمـــشـــاركــــات »
16-Aug-2009, 11:10 AM
نجيب حقوقنا عنوة وطيبة نعطي المغلاق
العرض العادي
