بسم الله الرحمن الرحيم ..
هذه الأبيات جادت بها قريحة الشاعر الكبير عبدالله بن نايف بن عون
عندما قام الموظف في الخطوط السعودية ( برجس بن سعود بن صويلح الدلبحي )
بعمل مايلزم بعد ان تأخر الشاعر ابن عون عن الطائرة المغادر على متنها من مطار جده الى الرياض واقلعت بدونه
وقام برجس بن سعود بألحاقه الى الرحله الآخرى وإيجاد مقعد له رغم الزحام الكثيف
ثمّ سافر بحفظ الله ورعايته ..
يقول عبدالله ابن عون
يا حزام انا عقب ما فاتتْني الرحلـه=جاني سميّن لبو نايـف* ومشانـي
سموه برجس وقام الطيب يرجحلـه=ما دلّبح الدلبحـي عنّـي وخلانـي
ادلا على شنطتي قـدام ل/ شرحلـه=وفالمركب الزين ركدهـا ونادانـي
برجس عسى باب سور الخير يفتحله=والشرّ بابه يسكـر عـن كحيلانـي
اللي يبى ام العيون السود تطمحلـه=يفعل مثل فعل برجس طير حورانـي
شيروا على اللي تحط الروج والكحله=تختار برجس وتطمح له على شاني
واللي يبي يمدح الممدوح يسمحلـه=هو يستحقه وانا مانيـب خسرانـي
واللي يبي حامض العلم ايتوضّحلـه=في مدح برجس يدورنـي ويلقانـي
والاّ الردي يوم يمدح ويش يمدحلـه=ما يثمر المدح في طير ابن برمانـي
اللي تنكّـس بعـد راعيـه لوّحلـه=مشتالن الحيّه الرقطـاء ام نيبانـي
* ( ابو نايف هو الشيخ الشاعر برجس بن عصاي الدلبحي )
وعندما سمعها الشاعر مطر بن صالح الدلبحي
جاراها بهذه الأبيات :
يا صقر ابن عون لو ما تعْرفه رح له=سلم عليه وعطـه علمـي وقيفانـي
ثنّ الثنا له على ما قال واصدح لـه=قلّـه هـذا سلـم جدانـك وجدانـي
عدودنا جمّها يروي ماهـي ضحّلـه=وفعولنا ما تبـي شاهـد وبرهانـي
والدلبحي حزّة الواجب ما نسمح لـه=يعيش برجس وله شكري وعرفانـي
يستاهل المدح ابن عمّي وانا افرحلـه=زهاه مدح ابن عون وهاضت اشجاني
يا طيب جزل القصيد ان جاك من فحله=بيطاره اللي يغنـي عـذب الالحانـي
اللـي يعـد الصحيـح ولا يصححلـه=الاّ بصـحّ الله لسانـه مـن لسانـي
طرايفه مثل طعم الشهد مـن نحلـه=وباقي فعولـه ترجّـح كـل ميزانـي
والطيّب اللي سنام المجـد يطمحلـه=ابفتخر بـه واعـده خيـرة اخوانـي
ابوه سماه برجـس كيـف ندمحلـه=لا صار ماهو مثل برجـس بليهانـي
وعندما سمعها الشيخ الشاعر برجس بن عصاي
جادت قريحته بهذه الابيات :
مطر يعرف المواقف قبل تشرحلـه=واللي يرد الثنـا ماهـوب غلطانـي
والناجح اللي صبيّ الجود صرّحلـه=شاعر عتيبه ما غيره شاعرٍ ثانـي
هو راعي الكلمه الجزله وتصلحلـه=عبدالله اللي لكـل الطيـب عنوانـي
حاون جميع المعارف مـا يلمحلـه=واعلى من المدح في تكوين الانساني
مفروضن اللي جنح للطيب نجنحلـه=والاّ الصويتي يفـوز بكـل ميدانـي
يآرد عدود الرهى لو طرقها وحلـه=وافي خصايل وله فالمجتمع شانـي
لعلّ بنت ارجحيّـن مـا تمرجحلـه=تروح مـرواح معصيـرن بدخانـي
لا عاد ابوها فحل واوصافها رحلـه=مفروض ما ترتخي لفـلان وفلانـي
سوات من يخط الضريبه يوم تسنحله=قد قالوا اهل المثل للعلـم نيشانـي
الموضوع منقول ..
« آخـــر الـــمـــشـــاركــــات »
14-Oct-2009, 08:53 PM
جديد ابن عون .. قصيدة موقف !!
العرض العادي
